música: Adagio assai. Maurice Ravel
Non hai nada no mundo, nada
tan fondo, lúcido e fermoso
como a nidia claridade
da palabra.
Ouh: a palabra!
Máxico paxaro deslumbrado,
floración da vida,
sangue caudal e luminoso,
certísima memoria do futuro.
Un ama até os límites
o impenetrábel misterio
do silencio
e, para defendelo, usa
a forza poderosa da palabra.
Non sabemos se primeiro foi
a luz ou a palabra,
a palabra da luz,
a luz da palabra,
a palabra sen luz,
a luz sen a palabra.
Mais a palabra ten luz
e pode, quizais, acontecer
que a luz non ten palabra.
Manuel María